Il-Każ Pegasus – Irvin Vella, Investigatur Virtwali #08
Storja waħda, b’żewġ investigazzjonijiet, waħda intriganti u b’ħafna taħbil, l-oħra dwar każ iżgħar, li jgħin lil Irvin Vella jlesti t-teżi biex finalment iwettaq il-ħolma li jsir investigatur privat. Għat-tnejn li huma, Irvin ixammar il-kmiem. Iżda, hemm xi ħaġa li donnha mhix tagħmel sens …
Il-Każ Pegasus huwa t-tmien volum fis-serje ta’ kotba għat-tfal, dik tal-Investigatur Virtwali. Idebutta fis-suq tal-kotba bil-Malti f’Ottubru 2023, pubblikazzjoni ta’ Merlin Publishers.
Dwar l-istorja
Il-każ ewlieni tal-istorja jibda propju l-għada li l-Investigatur Virtwali solva l-Każ tal-Ħabsi Bla Ħtija. Din id-darba l-klijent tiegħu huwa raġel li ltqajna miegħu fil-ktieb ta’ qabel, it-Tabib Timothy Pavia. Hu u Irvin iltaqgħu l-ħabs, u għamlu ftehim – jekk Pavia jgħin lil Irvin inaddaf ismu u joħroġ mill-ħabs, Irvin kien se jirreċiproka, u jgħin lil Pavia fuq biċċa xogħol taħraq. It-Tabib żamm kellmtu, u issa jmiss lill-investigatur virtwali biex jagħti sehmu. Se jirnexxielu jwettaq dak li għandu f’moħħu?
Bħal ma jiġri spiss fir-rakkonti ta’ Irvin Vella, l-affarijiet li qed jinvestiga dwarhom m’humiex daqshekk sempliċi daqs kemm jidhru. Waqt li għaddej bil-missjoni tiegħu li jgħin lil Pavia, Irvin jiltaqa’ ma’ grupp żgħir ta’ nies li jiftħulu għajnejh dwar biċċa xogħol mhux tas-soltu. F’din il-kwistjoni hemm involuti mijiet t’eluf ta’ ewro.
Aktar ‘il quddiem, l-investigatur jispiċċa xhud ta’ att kriminali li żgur ma kienx jobsor li se jara … din l-esperjenza jkollha effett qawwi fuq Irvin. Biex isolvi dan il-każ, se jkollu jħaddem moħħu aktar minn qatt qabel.
It-tieni biċċa xogħol li jrid isolvi Irvin hija dik ta’ riċerka intensiva biex ilaqqa’ tnejn min-nies li ilhom ma jaraw lil xulxin kważi sittin sena. Mhix ħaġa faċli, imma bħal dejjem, Irvin determinat.
L-ispirazzjoni wara l-Każ Pegasus
Il-Każ Pegasus jagħlaq storja li għandha l-bidu tagħha fil-ktieb ta’ qablu, Il-Każ tal-Ħabsi Bla Ħtija. Ma jfissirx li min ma qarax każ numru sebgħa mhux se jifhem din l-istorja. Kemm ktieb numru 7, kif ukoll ktieb numru 8 huma stejjer sħaħ, li jistgħu jinqraw waħedhom.
L-akbar ispirazzjoni għal dan il-ktieb ġiet minn stejjer tal-ispiji, bħal Bourne Identity (Robert Ludlum), Six Days of the Condor (James Grady) u oħrajn. Meta qed insemmi dawn, mhux qed nirreferi għal plot tagħhom fih innifsu, imma ispirajt ruħi mill-effett (jew feeling), li jħallu fuqi bħala qarrej. Dak il-misteru li jqanqal tant kurżitá, dik ix-xi ħaġa li tidher mod, imma hija mod ieħor.
Id-disinn tal-qoxra u l-illustrazzjonijiet ta’ ġewwa huma xogħol il-bravissima Francesca Grech. Għal darboħra, użat il-ħila tagħha biex tagħti lill-ktieb ix-xejra misterjuża li tistħoqlu.
Nixtieq inrodd ħajr lit-Tim Merlin u lill-ħafna oħrajn li tawni għajnuna imprezzabbli biex dan it-tmien każ tal-investigatur virtwali jasal għand il-qarrejja.
Is-sensiela kollha
Il-Kotba kollha fis-sensiela Irvin Vella, Investigatur Virtwali huma dawn:
- Il-Każ Manduca (2015)
- Il-Każ tas-Serqiet Strambi (2016)
- Il-Każ tal-Gżejjer tat-Teżor (2018)
- Il-Każ Stella Maris (2019)
- Il-Każ tal-Maħżen Mitluq (2020)
- Il-Każ tat-Tfajla Maħtufa (2021)
- Il-Każ tal-Ħabsi Bla Ħtija (2022)
- Il-Każ Pegasus (2023)
- Il-Każ tal-Bottegin tax-Xorti (in progress)